حميدة بنت مسلم (عليهما السلام)

[النفس المطمئنة]

طفله او وحيده * وكاتلها همها
ظلت حميده * اتعيش ابيتمها
وبهاي الآلام - خلتها الايام - اتعيش ابيتمها
----------
من يوم المشه عنها - مسلم رايد الكوفه
من يوم اللي ودّعها - وحبّت راسه وچفوفه
من يوم التركها ابهم - گلبها ما سكن خوفه
حميده باليتم حسّت - بعد والدها متشوفه
اوداعه إله اتشوف * اوداع المنيه
اعليه ظلت ابخوف * امن الكوفه هيه
ليها القدر ضام - خلتها الايام - اتعيش ابيتمها
----------
أيام وخبر مسلم - وصلت للسبط غدروه
گالوله غريب اوحيد - وابأبشع قتل قتلوه
گالوا جسمه كله اجراح - وراسه امن الجسم فصلوه
ومن سطح القصر تالي - جثه اعله الأرض يرموه
ظلت طفلته * ابجمرة ألمها
اشلون ابچتلته * يخبرها عمها
ختموت الاحلام - خلتها الايام - اتعيش ابيتمها
----------
لفت يم عمها واتگله - يا بعد اهلي وناسي
ابهاي آلامي بالعبره - يعم مختنگه أنفاسي
أشو گلبي ابوجل خايف - او ويّاي الدهر قاسي
ومثل مسح اليتامى انته - يعمّي تمسح ابراسي
مسح اليتامه * تمسح عليه
هذي علامه * راح امن اديه
هذا الخبر سام - خلتها الأيام - اتعيش ابيتمها
----------
حميده الفگد ابوها الحيد - ما نشفت دمعها العين
كل ساعه وتنادي ابصوت - چانتلي المصيبه وين
دهر يتّمني جرّحني - وبعدني خايفه امن البين
تهون امصيبتي والله - بس سالم يظل حسين
بدموع العيون * العمي ندبته
كل نايبه اتهون * بس سالم انته
ايتيمه امن الايتام - خلتها الايام - اتعيش ابيتمها
----------
أمل هذي اليتيمه چان - حسين ابچفه يرعاها
تاليها القدر فعله - يتيمة عمها خلاها
طبت كربله وشافت - دم وخوف وضماها
شافت كل اهلها انحور - جثث متخضبه بدماها
اتشاهد وتسمع * بالغاضريه
حتى اللي يرضع * ذبحوه أُميه
وتالي ابسبي الشام - خلتها الأيام - اتعيش ابيتمها
----------
بعد يوم القتل والدم - بعد يوم العطش والحر
بعد چف مسلم اعليها - حميده لنها تتيسر
بعد عين الحُسين ايگوم - شمر اعليها يتجسّر
امتون الطفله بالضربات - ابسوط الحسره تتكسر
بيها تشب نار * محد عرفها
طفله والاقدار * دولبها چفها
قربان الاسلام - خلتها الايام - اتعيش ابيتمها

حيدر النجفي